Y Gofalwyr Maeth a Newidiodd Fy Mywyd
Fe ddechreuais i mewn gofal maeth pan oeddwn i’n 12 oed. Dros y pedair blynedd nesaf, symudais rhwng sawl lleoliad gwahanol cyn dychwelyd i fyw gyda fy rhieni yn 16 oed. Nid oedd fy amser mewn gofal bob amser yn hawdd, ond ar hyd y ffordd, fe wnes i gwrdd â phobl a gafodd effaith barhaol ar fy mywyd – pobl a ddangosodd i fi beth oedd cariad, sefydlogrwydd, a theulu yn ei olygu go iawn.
Un o’r dylanwadau mwyaf yn fy mywyd oedd gofalwr maeth a edrychodd ar fy ôl am wythnos yn unig fel lleoliad brys. Er nad oeddwn i gyda nhw yn hir, fe ddaethon nhw i fod fel teulu i mi. Fel oedolyn, dw i wedi bod ar wyliau teuluol gyda nhw, maen nhw wedi fy helpu trwy newidiadau mawr mewn bywyd, a phan ges i blant fy hun, roedden nhw yno i fi bob cam o’r ffordd.
Newidiodd gofalwr maeth arall fy mywyd mewn ffordd hollol wahanol. Cyn i fi gael fy rhoi gyda hi, roeddwn i wedi bod yn gwrthryfela – yn ymddwyn yn wael fel y byddai fy ngofalwyr maeth yn dweud na allan nhw edrych ar fy ôl mwyach. Roeddwn i eisiau bod mewn rheolaeth, symud lleoliadau ar fy nhelerau fy hun, ac roeddwn i’n gwybod yn union sut i wneud i hynny ddigwydd. Fe weithiodd nes i fi gael fy rhoi gyda gofalwr a wrthododd droi ei chefn arna i. Dim ots beth oeddwn i’n ei wneud, arhosodd hi’n amyneddgar ac yn ddeallus. Doedd hi ddim yn gadael i fi ei gwrthod. Am chwe mis, roeddwn i’n gwneud popeth y gallwn i wneud iddi droi ei chefn arna i, ond wnaeth hi byth. Yn y pen draw, sylweddolais y gallwn ymddiried ynddi. Roedd hi wir yn poeni amdana i, ac unwaith i fi dderbyn hynny, fe wnes i newid. Ddwy flynedd yn ddiweddarach, fe es i yn ôl i fyw gyda fy rhieni, ond fe wnes i barhau i ymweld â hi oherwydd ei bod wedi dod yn rhan mor bwysig o fy mywyd.
Y Gwersi sy’n fy Siapio
Fe wnaeth bod mewn gofal maeth ddysgu cymaint i fi, ond y wers fwyaf a ddysgais oedd beth mae’n ei olygu i fod yn rhan o deulu. Dangosodd fy ngofalwyr maeth gariad, amynedd a phenderfyniad i fi, a dw i’n cario’r gwerthoedd hynny gyda fi hyd heddiw. Fe wnaethon nhw ddysgu i fi mai teulu sy’n dod gyntaf, a dyna sut dw i’n byw fy mywyd nawr, yn enwedig fel rhiant fy hun.
Cadw mewn Cysylltiad
Mae rhai o’r gofalwyr maeth roeddwn i’n byw gyda nhw yn dal i fod yn rhan o fy mywyd. Maen nhw fel teulu i fi, ac maen nhw’n parhau i gefnogi fi a fy mhlant. Mae gwybod bod gen i’r cysylltiad hwnnw o hyd, y system gymorth honno, yn golygu popeth.
Cyngor i Bobl Ifanc mewn Gofal
Pe bawn i’n gallu siarad ag unrhyw berson ifanc sydd mewn gofal ar hyn o bryd, byddwn i’n dweud wrthyn nhw: peidiwch â gwrthod pobl. Dw i’n gwybod ei fod yn anodd, ac weithiau mae’n teimlo fel nad oes neb yn deall, ond mae yna bobl sydd wir eisiau helpu. Gadewch iddyn nhw helpu.
Neges i Ofalwyr Maeth
I unrhyw un sy’n meddwl am ddod yn ofalwr maeth – byddwch yn amyneddgar. Dydych chi ddim yn gwybod beth mae plentyn neu berson ifanc wedi bod drwyddo bob amser. Efallai y bydd y misoedd cyntaf yn anodd, ond peidiwch â rhoi’r gorau iddi. Mae angen iddyn nhw wybod y byddwch chi yno iddyn nhw, dim ots beth. Arhoswch gyda nhw trwy’r amseroedd anodd oherwydd, yn y pen draw, byddwch chi’n gwneud cynnydd, a bydd y cysylltiad hwnnw’n golygu gymaint.
Beth sydd angen newid yn y system ofal
Pe bawn i’n gallu newid un peth am y system, rhoi mwy o gymorth i blant mewn gofal fyddai hynny. Mae gweithwyr cymdeithasol yn newid yn rhy aml, ac mae hynny’n ei gwneud hi’n anodd iawn ymddiried mewn rhywun newydd bob tro. Mae rhai gweithwyr cymdeithasol heb brofiad bywyd hefyd, sy’n gallu ei gwneud hi’n anodd iddyn nhw ddeall beth rydyn ni wedi bod drwyddo. Byddai mwy o gysondeb a dealltwriaeth yn gwneud gwahaniaeth enfawr i bobl ifanc sy’n mynd trwy’r system ofal.
