mathau o faethu

Mae gofal tymor byr yn gallu golygu aros dros nos, penwythnosau rheolaidd, neu fyw yn rhywle am flwyddyn. Yn syml, mae’n golygu cyfnod o amser sy’n cynnig lle diogel a saff i blentyn aros a theimlo ei fod yn cael ei garu.

Gall fod yn rhywbeth dros dro rhwng opsiynau gofal; arhosiad byrrach wrth i ofal tymor hwy gael ei drefnu, sydd hefyd yn cael ei alw’n sefydlogrwydd, neu ddychwelyd at ei deulu biolegol.

Eich rôl chi fydd helpu rhywun pan fydd angen hynny arno fwyaf – dod yn rhan hanfodol o daith faethu rhywun. Darparu’r cysondeb a’r cariad mae’n ei haeddu cyn dychwelyd gartref neu ymlaen i bennod newydd.

Yn wahanol i ofal tymor byr sy’n cynnig ateb gofal byrrach, mae gofal maeth tymor hir yn darparu teulu maeth a rhywle i’w alw’n gartref, pan fydd hi ddim yn bosibl i blant ddychwelyd at eu teuluoedd am gyfnod sylweddol o amser.

Mae Maethu Cymru Wrecsam yn cymryd amser i baru plentyn neu berson ifanc â’r cartref maeth iawn sy’n addas i’w hanghenion. Er bod gofal maeth tymor hwy yn fwy parhaol, mae’n ymwneud â darparu cartref diogel a chariadus am gyhyd ag sydd ei angen ar y plentyn

Weithiau, mae hoe fach yn gwneud lles i bawb. A dyna’n union beth rydyn ni’n ei gynnig i’r plant lleol yn ein cymuned – seibiant bach.

Mae seibiant byr, sydd hefyd yn cael ei alw’n ofal cymorth, yn cael ei gynllunio ymlaen llaw ac mae’n cynnig profiadau newydd gwych i’r bobl ifanc sydd angen hynny. Gall seibiant byr fod am ychydig oriau, am ddiwrnod neu am benwythnos a gall fod yn drefniant untro, misol neu reolaidd.

Mae’n golygu bod yno iddyn nhw, dod yn rhan o’u teulu estynedig, cynnig cartref cariadus am gyfnod mor hir neu mor fyr ag sydd ei angen arnyn nhw.

Mae maethu rhiant a phlentyn yn gyfle anhygoel i rannu eich profiadau a’ch bywyd eich hun â rhywun sydd ei angen, ac mae’n helpu teuluoedd i aros gyda’i gilydd. Mae gennych gyfle i annog aelodau’r genhedlaeth nesaf i fod y gorau y gallan nhw fod gan ddatblygu eu hymdeimlad o hunaniaeth yn eich cartref.

Mae gofalwyr maeth rhiant a phlentyn yn cefnogi mamau a thadau, naill ai gyda’i gilydd neu ar wahân, i fagu eu plentyn. Rydych chi’n yn dod yn fodel rôl cadarnhaol, gan ddarparu amgylchedd diogel a chefnogol, grymuso rhieni i sefydlu trefn, a gwella eu sgiliau er mwyn diwallu anghenion unigol eu plant.

Mae’n ymwneud â helpu rhieni i ddatblygu’r sgiliau sydd eu hangen arnyn nhw, yn bersonol ac ar gyfer eu plentyn.

Mae gan rai pobl ifanc a phlant yn ein cymuned yn Wrecsam anghenion emosiynol neu ymddygiadol mwy cymhleth, ac mae gofyn cael gwahanol fath o ofal ar eu cyfer. Mae lleoliadau therapiwtig yn cynnig y lefel ychwanegol hon o ofal arbenigol ac os byddwch yn dewis cynnig y math hwn o ofal, byddwn yn darparu’r gefnogaeth a’r hyfforddiant y bydd eu hangen arnoch.